Om meg

Frå eg var lita var min store lidenskap teikning og måling. Denne interessa har vore der heile livet mitt, både eigenproduksjon og å undervise. Lidenskapen for kunst og handarbeid førte til at eg først tok ei utdanning på husflidskulen på vevlinja, og så som møbelsnekkar der eg fekk dyrka interessa mi for å jobbe med tre, og å skape noko med hendene mine.

Deretter tok eg ei utdanning som lektor i forming, noko som førte til at eg både fekk utvikla mine eigne evner innan kunst og handverk, og i tillegg fekk lære vekk kunnskapen min til elevar. Det å lære andre og assistere andre gjennom ein kreativ prosess er noko som gjev meg mykje gleda og er noko eg brenn for. Eg har undervist som formingslærar ved Gloppen ungdomsskule, Fjordane Folkehøgskule, Høgskulen i Volda, Mo og Jølster vidaregåande skule og Kronstad vidaregåande skule.

Sidan eg tok over mora mi sin barndomsheim på vakre Sandane på 2000-talet, ein stad omringa med fjord og fjell, sette eg i gong med kurs i Intuitiv maling, eit kurs eg haldt mellom 2003 og 2013. Etter dette sette eg i gong med restaurering av låven, som høyrde til eigedomen, for fullt — ein draum eg hadde hatt sidan 90-talet og som blei mogleg etter eg fekk støtte frå Innovasjon Norge og SMIL-midlar. Sidan eg begynte har alt mitt kreative fokus gått på å restaurere låven, og tenk det, no står den snart klar! Eg har bytta kledning utvendig, isolert, panelt tak og veggar innvendig, restaurert gamle vindauge og supplert med isolerte innervindauge, i tillegg til mykje anna.

No står endeleg låven klar som det atelieret og den treverkstaden eg alltid har ønska meg. Eg har no starta opp att med kurs innan måling, og på sikt med grafiske trykk, øksebruk og enkelt trearbeid. Eg vil òg stille ut eigne og dottera mi Marte Kristi sine arbeid i låven.